Daspò dai ³Clubs pal tratament dai alcoliscj² e dai cors par liberâsi de sclavitût dal fum, a son nassudis ancje lis Comunitâts par saltâ fûr dal zûc di azart. Chel di zuiâ di bêçs al è un stîl di vite ch¹al scuancasse lis personis e ch¹al infete lis fameis. Al pont che si tache a cjacarâ di ³malatie², ch¹e domande une terapie di pueste par jessi curade. E je l¹iniziative di ³Agita², l¹associazion dai ex zuiadôrs di azart e des lôr fameis nassude in Friûl ai 25 di Mai dal 2000 e direzude di Adriano Valvasori. A la vilie de VI convigne taliane de clape che, ai 10 di Decembar, a Cjampfuarmit e fronte la cuistion ³Aiût mutuâl e terapie pai zuiadôrs di azart e pes lôr fameis: esperiencis e perspetivis in Italie², o vin incuintrât Rolando De Luca, il psicoterapeut ch¹al à fondât il prin centri furlan pe cure dai ex zuiadôrs

Al è dificil che «un zuiadôr compulsîf al domandi di jessi judât par liberâsi dal so problem. Te sô dipendence, difat, lui al sta benon e cun comut. Des voltis, parfin la sô famee s¹inlût di podê controlâ il problem e duncje di jessi in stât di disbratâlu cence la dibisugne di un jutori. A la fin, a rivin ca di noaltris cuant che la situazion e je aromai degjenerade». Rolando De Luca, il psicoterapeut ch¹al à metût sù a Cjampfuarmit il prin centri furlan di cure par ex zuiadôrs di azart e pes sôs fameis, al conte cussì d¹indulà ch¹e je nassude cheste esperience. «Il nestri centri al è madressût tal gno cjâf. O ai une formazion in terapie familiâr e analitiche e une volte mi ocupavi de dipendence dal alcul. Po o ai tacât a interessâmi dal fum e, tal 1995, o ai pensât di fâ alc par frontâ il problem dal zûc. Daspò 10 agns di lavôr, o podìn dî ch¹o vin dimetudis 90 fameis». Cuant che vie pal mês di Otubar al è stât presentât a Udin il volum de zornaliste di ³Repubblica² Silvana Mazzocchi ³Mi gioco la vita², Rolando De Luca, ch¹al à scrit la jentrade, al à «³cuinçât² lis storiis di un pôcs dai ex zuiadôrs dal centri di Cjampfuarmit, contadis de autore, cul realisim spaventevul dai dâts statistics e des definizions».
Di un pôcs di agns incà, difat, in Italie il zûc di azart al è deventât un¹ativitât massive di proporzions economichis e sociâls sproposetadis. A son agns che si slargje simpri di plui. I ultins scandais nus disin che passe l¹80% de int a son interessâts al zûc di azart. I dâts sientifics disponibii, po, nus pandin che dal 1 al 3% de popolazion adulte a son tocjâts dal zûc di azart patologjic. «Dispès chei ch¹a rivin ca di noaltris ­ al motive De Luca ­ a son i parincj o i amîs dal zuiadôr che, in dite sô, nus domandin jutori.
La terapie familiâr che nô ur proponìn al è un lavôr ch¹al dure tal timp e ch¹al finìs dopo agns di tratament.
E covente une terapie profonde e sprolungjade parcè che il zûc, struche struche, al è un sintom e gjavâlu cence curâ lis causis che lu causionin al risie di jessi come gjavâ di une cjase dirocade chei pôcs modons che le tegnin ancjemò sù. La terapie e cjape dentri dute la famee ch¹e ven cjapade in cure e po dimetude tal so complès».
Rivâts al pont de dimission, i problems dal reinseriment te societât a restin e biel par chel, ai 25 di Mai dal 2000, si è dade dongje in forme legâl l¹³Associazion dai ex zuiadôrs di azart e des lôr fameis² (³Agita²; agita@sosazzardo.it - www.sosazzardo.it), ch¹e à la sô abitance a Cjampfuarmit e ch¹e à par president Adriano Valvasori. La clape e je ospitade li dal municipi, pal fat che la ministrazion comunâl e à ricognossût l¹alt valôr sociâl dai siei fins. Fra lis finalitâts de ³Agita², a son la prevenzion e il tratament dal zûc di azart e di chês altris dipendencis, la promozion e la tutele dai derits civîi dal zuiadôr di azart o dal ex zuiadôr e de sô famee e il reinseriment dai zuiadôrs o dai ex zuiadôrs tal mont dal lavôr e te comunitât.
La famee interie e je cjapade dentri adimplen te terapie di grop parcè che ancje jê e je cjapade dentri adimplen tes pierditis dal zuiadôr. Sichè l¹analise no je proponude dome a cui ch¹al puarte il sintom ma a dut il nucleu familiâr che, biel ch¹al cjape part a la terapie, cun o cence il zuiadôr, s¹inacuarç di cemût che il problem nol rivuarde dome il zuiadôr ma ancje ducj i components de famee.
In gracie de analise, la famee e comence a mudâ, ³permetint² al zuiadôr che ancjemò nol è rivât dongje di jentrâ dentri ancje lui tal grop. «Acetâ di tacâ la terapie e di frontâ un lavôr unevore lunc e ch¹al pues ancje causionâ patiments, al vûl dî acetâ di meti in discussion i siei compuartaments e di decidi di frontâ lis cuistions ch¹a an motivade cheste situazion», al sclarìs De Luca, ch¹al continue: «La terapie e je dolorose e si sa ben che nissun nol vûl patî. Dut ce ch¹al ven frontât tal grop al zove par rifleti e dome daspò di une biele dade di timp si svilupe la capacitât di rifleti sore». Chei ch¹a an acetât di contâ la sô storie di ex zuiadôrs o i familiârs dai zuiadôrs a ripetin dispès che il zûc al è come «vivi intun mont d¹inlusion». Salacôr propit chel che si vîf intune societât che no à nissune percezion de periculositât dal zûc di azart, dulà che, biel che si spindin 23 miliarts di euros tal zûc, la publicitât e tire adilunc in formis sproposetadis e lis instituzions no calcolin afat il problem.

Apontament a Cjamfuarmit

Sabide ai 10 di Decembar, l¹Associazion dai ex zuiadôrs di azart e des lôr fameis e organize la VI convigne sul auto aiût e su la terapie par zuiadôrs. Il confront fra lis esperiencis e lis perspetivis di cure in Italie al tache a lis 9, li dal municipi di Cjampfuarmit, ch¹al patrocine il congrès cu la Regjon e cu la Provincie di Udin. Cu l¹³Agita², a colaborin te organizazion lis Caritas diocesanis dal Friûl e di Triest e la Consulte taliane cuintri de usure. Lis relazions a saran proponudis di Alberto d¹Urso (³Usura ed azzardo oggi nelle esperienze delle Fondazioni Antiusura²) e di Maria Sinatra di Bari (³Gioco d¹azzardo: l¹osservatorio di Bari²). A lis 10, e tacarà la presentazion des esperiencis dai grops dai ³Giocatori Anonimi in Italia², dai ³Gruppi terapeutici per giocatori d¹azzardo dell¹Ass2 di Olbia² e dai 9 grops terapeutics di Cjampfuarmit. Si resonarà ancje di zoventût e di zûc di azart, di gnovis dipendencis, d¹impulsivitât e di ³gambling² e de centralitât de famee tal auto-aiût e tal jutori mutuâl. Daspò misdì, l¹acent al sarà cjalcjât sui aspiets legâi e penâi e sui aspiets patologjics dal zûc di azart.