Si slargje simpri plui l’epidemie dal zûc di azart. Svicinansi la convigne anuâl de associazion “Agita”, programade a Cjampfuarmit ai 10 di Otubar, il president e psicoterapeut Rolando De Luca al à tacât a publicâ lis cifaris di cheste forme mastine di dipendence. Li dal Centri di Cjampfuarmit si presentin sore il dut zuiadôrs fra 40 e 50 agns, deplomâts e lavoradôrs dipendents. Il 62% dai zuiadôrs al fume un grum e al consume bevandis alcolichis. Lis feminis a rapresentin il 13% di chei ch’a domandin di jessi judâts. I zuiadôrs a restin ingabolâts prin di dut dai “casinò” (28%), po de “new slot” (ex “videopoker”; 19%), dal lot (16%), dal “superenalotto” (13%), dai “Gratta e vinci” (11%), des corsis dai cjavai (5%) e po di bischis (2%), “bingo” (1%), “totocalcio” e scomessis (5%). L’associazion di Cjampfuarmit dai ex zuiadôrs e je nassude dal 2000 e, d’in chê volte, e propon cun sucès grops di jutori mutuâl pai zuiadôrs e pai siei di cjase.